Aktuelni predsjednik Sjedinjenih Američkih Država Donald Tramp objavio je da su američke oružane snage izvele precizne napade na tri ključna nuklearna postrojenja u Iranu – Fordo, Natanz i Isfahan – i da su svi planirani ciljevi uspješno pogođeni.
„Završili smo naš vrlo uspješan napad na tri nuklearna postrojenja u Iranu, uključujući Fordo, Natanz i Esfahan. Svi avioni su sada izvan iranskog zračnog prostora“, naveo je Tramp na svojoj platformi Truth Social.
Prema njegovim riječima, na Fordo je bačen „puni teret bombi“, a američki avioni se trenutno vraćaju u matične baze. „Ovo je istorijski trenutak za Sjedinjene Američke Države, Izrael i cijeli svijet“, poručio je Tramp, ističući da Iran mora „pristati prekinuti ovaj rat“.
Predsjednik SAD-a je takođe podijelio poruku s jednog obavještajnog kanala, u kojoj se navodi da je „Fordo nestao“, čime se implicira potpuna destrukcija ovog postrojenja. Podsjetimo, Fordo je već ranije bio meta izraelskih napada, u sklopu sve većih tenzija koje su posljednjih sedmica eskalirale u otvoreni sukob između Irana i Izraela.
Iran priznao napade, tvrdi da nema ozbiljne štete
Iranske vlasti su potvrdile da su mete američkih napada zaista bila nuklearna postrojenja Fordo, Natanz i Isfahan. Akbar Salehi, zamjenik guvernera provincije Isfahan zadužen za bezbjednost, izjavio je da su se „u Natanzu i Isfahanu čule brojne eksplozije“ i da su zabilježeni napadi u blizini strateških objekata.
Ipak, prema riječima Hassana Abedinija, političkog urednika državne televizije, „sva postrojenja su evakuisana već prije nekog vremena“, a nuklearni materijal je prethodno premješten. „Čak i ako su tvrdnje američkog predsjednika tačne, Iran nije pretrpio ozbiljan udarac“, rekao je Abedini u direktnom televizijskom uključenju.
Koordinacija sa Izraelom i diplomatski kontakt s Teheranom
Američki mediji, pozivajući se na izvore bliske administraciji, prenose da je Vašington unaprijed obavijestio Izrael o planiranim napadima. CNN javlja da je predsjednik Tramp, nakon operacije, razgovarao s izraelskim premijerom Benjaminom Netanjahuom.
CBS News navodi i da su Sjedinjene Države neposredno prije napada diplomatskim putem kontaktirale Teheran, šaljući poruku da se ne radi o početku šire vojne kampanje, već o ograničenoj akciji. Iz Vašingtona je poručeno da „nema namjere za promjenu režima“.
Situacija u regionu i dalje ostaje napeta, a međunarodna zajednica poziva na uzdržanost i hitnu deeskalaciju sukoba.
